21-sentabr kuni Davlat soliq qo‘mitasi raisi Sherzod Kudbiyev va Rossiya Federal Soliq xizmati rahbari Daniil Yegorov o‘rtasida uchrashuv bo‘lib o‘tdi. 

Uchrashuvda shu yilning 14-aprel kuni Toshkentda imzolangan bitimning bajarilishi va O‘zbekiston Respublikasida kelgusida soliq maʼmuriyatchiligini yanada raqamlashtirishga qaratilgan ishlar batafsil muhokama qilindi. 

Xususan, tomonlar joriy yil oxirigacha soliq to‘lashdan bo‘yin tovlash sxemalarini tahlil qilish va aniqlashni o‘z ichiga olgan qo‘shilgan qiymat solig‘ini monitoring qilishning avtomatik tizimini joriy etish bo‘yicha hamkorlikdagi ishlarni yakunlashga kelishib oldilar. 

Shuningdek, onlayn kassa texnikalari va elektron cheklar tahliliy tizimini ishga tushirilishi kutilmoqda. Tizim chakana savdo obyektlarining onlayn nazorat-kassa texnikalari bilan qamrab olish darajasini baholash, shuningdek, tovarlar va xizmatlar realizatsiyasi tarkibi haqida jamlangan maʼlumotlarni avtomatik tarzda olish imkonini beradi. 

Yirik hajmli maʼlumotlarni qayta ishlash sohasida tajriba almashish uchun shu yil oktyabr oyida Davlat soliq qo‘mitasi bir guruh dasturchilari va maʼlumotlar bazasi administratorlarini Moskva shahriga yuborish to‘g‘risida kelishuvga erishildi.

Sherzod Kudbiyev ikki davlat soliq xizmatlari o‘rtasidagi yaqin va samarali hamkorlik uchun Rossiya Federal Soliq xizmati rahbariga minnatdorlik bildirdi va uni yaqin kunlarda O‘zbekistonga tashrif buyurishga taklif etdi. 

O‘z navbatida, Daniil Yegorov O‘zbekiston rahbariyati tomonidan soliq maʼmuriyatchiligida amalga oshirilgan izchil islohotlarning samaralarini qayd etib o‘tdi.

Xususan, elektron hisobvaraq-fakturalarga to‘liq o‘tish, tovarlar va xizmatlarni kodifikatsiyalashni joriy etishdagi muvaffaqiyatli tajriba rossiyalik hamkasblarda katta qiziqish uyg‘otdi.

Davlat soliq qo‘mitasi delegatsiyasining Rossiya Federatsiyasiga tashrifi davom etmoqda.