O‘zbekiston Respublikasi Vazirlar Mahkamasi huzuridagi Soliq qo‘mitasi

Қашқадарё вилоятининг Деҳқонобод туманида Давлат солиқ қўмитаси ҳузуридаги Тадбиркорликни ривожлантириш офиси ташкил этилди

21/04/2021

Туман ва шаҳарларни комплекс ривожлантириш, аҳоли учун кафолатланган даромад манбаларини яратиш мақсадида, республикамиз барча ҳудудларининг “ўсиш нуқталари” аниқланиб, улардан ривожланишнинг “драйвери” сифатида фойдаланиш бўйича тизимли ишлар олиб борилмоқда.

Ушбу изчил ислоҳотлардан бири, Қашқадарё вилояти Деҳқонобод туманини писта ва каврак плантацияларига ихтисослаштирилган ҳудудга айлантиришдир.

Тоғли ҳудудлар иқлими писта ва каврак етиштириш учун қулай бўлганлиги ҳамда ушбу маҳсулотлар бошқа қишлоқ хўжалиги маҳсулотлари каби муҳим парвариш талаб қилмаслиги сабабли, Деҳқонобод туманининг тоғли ҳудудлари энг қулай жой ҳисобланади. Шу билан бирга, ушбу маҳсулотлар ички ва ташқи бозорларда барқарор юқори нархларда баҳоланади.

Шу мақсадда, Вазирлар Маҳкамасининг 2021 йил 5 апрелдаги “Қашқадарё вилоятининг Деҳқонобод туманини ижтимоий-иқтисодий ривожлантириш бўйича қўшимча чора-тадбирлар тўғрисида”ги

182-сонли қарори қабул қилиниб, унга мувофиқ Деҳқонобод туманида плантацияларни тадбиркорлик субъектларини жалб қилган ҳолда ташкил қилиш учун Давлат солиқ қўмитаси ҳузурида “Тадбиркорликни ривожлантириш офиси” МЧЖ (Лойиҳа офиси) ташкил этилди. Бир вақтнинг ўзида инвесторлар учун имтиёзли кредит ва субсидиялар ажратилиши кўзда тутилган.

Лойиҳа офисининг асосий вазифалари - плантациялар ташкил этишда инвесторларга ер майдонларини ажратиш учун танлов ўтказиш (24 та лотларга бўлинган жами 1 590 гектар майдон), шунингдек, доимий равишда лойиҳалар реализациясини мониторинг қилишдан иборат.

Бугунги кунда, Лойиҳа офиси ўз ишини бошлади ва танлов ўтказишга барча ташкилий масалалар амалга оширилмоқда.

Давлат солиқ қўмитаси барча инвесторларни лотларни ажратиш бўйича танловда фаол иштирок этишга таклиф этади!

Қўшимча маълумотларни Деҳқонобод тумани Давлат солиқ инспекцияси биносининг 7-хонасидан ёки (+998 75 612-11-51) телефон рақамига мурожаат қилиш орқали олиш мумкинлиги билдирилади.