Ulgurji hamda chakana savdo korxonalari faoliyatini amalga oshirishda moddiy-texnik baza, jumladan ombor va transport vositasi mavjudligi muhim ahamiyat kasb etadi.
Mustahkam moddiy-texnik baza savdo faoliyatini samarali yo‘lga qo‘yishning muhim asosi hisoblanadi. Yaʼni bugungi tezkor davrda bozor talabini o‘z vaqtida qondirmaslik biznes inqiroziga sabab bo‘ladi.
Amaldagi qonunchilikka ko‘ra har bir subyekt mavjud moddiy-texnik vositalarini o‘z balansiga hisobga olishi yoki ijara huquqi asosida foydalanganlik uchun tegishli hujjatlarni rasmiylashtirishi lozim.
Ammo ayrim korxonalar mazkur tartiblarni chetlab o‘tib, yuk va tovarlarini saqlash uchun ombor (shu jumladan, ijara asosida mulkdan foydalanish huquqi) hamda transport vositasi mavjud bo‘lmagan holda soliq hisobotlarida katta miqdorda tovar moddiy zaxiralari qoldig‘ini aks ettirib kelish holatlari uchramoqda.
Bu holat yuklarni saqlash hamda transport xizmatlaridan noqonuniy foydalanilganlikni anglatadi.
Xususan, soliq xavfi yuqori bo‘lgan 100 ta korxonada o‘rganish o‘tkazildi. Natijada ularning 21 tasi yuk saqlash ombori va transport vositasiga ega bo‘lmasada joriy yilning 1-sentyabr holatiga QQS hisobotlarida 2 mlrd so‘mdan 14 mlrd so‘mgacha tovar moddiy zaxiralari qoldig‘i mavjudligini ko‘rsatgani aniqlandi. Shuningdek, hisobotlarida qayd etilgan 63 mlrd so‘mlik tovar moddiy zaxiralar qoldiqlari omborda mavjud emasligi maʼlum bo‘ldi.
Bu kabi holatlarda QQS to‘lovchisi sifatida maxsus ro‘yxatdan o‘tish uchun yuborilgan arizalarni rad etish yoki mavjud QQS guvohnomasini vaqtincha to‘xtatib qo‘yish choralari ishlab chiqilmoqda.