Ўзбекистон Республикаси Вазирлар Маҳкамаси ҳузуридаги Солиқ қўмитаси

1 июндан айрим тадбиркорлик субъектлари солиқларни бўлиб-бўлиб тўлаши мумкин

22/04/2021

Жорий йилнинг 21 апрель куни Ўзбекистон Республикаси Президентининг «Тадбиркорликни қўллаб-қувватлаш тизимини такомиллаштириш, ишбилармонлик муҳитини янада яхшилаш бўйича қўшимча чора-тадбирлар тўғрисида»ги қарори қабул қилинди.

Мазкур қарор билан тадбиркорлик субъектларини узликсиз фаолият кўрсатишлари учун янада қулай шароит яратиш мақсадида, солиқ мажбуриятларини бажаришда имтиёзлар тақдим этилмоқда.

Хусусан 2021 йил 1 июндан солиқ қарзини тўлаш имкониятига эга бўлмаётган тадбиркорлик субъектларига солиқларни бўлиб-бўлиб тўлаш ҳуқуқи бериш назарда тутилмоқда. Ушбу имтиёз уч йилдан ортиқ вақтдан буён фаолият кўрсатаётган ҳамда солиқларни муддатида тўлаб келган хўжалик субъектларига татбиқ этилади.

Таҳлилларга кўра, солиқ тўловчи юридик шахсларнинг 201,3 мингдан ортиғи (67,7%) уч йилдан ортиқ вақтдан буён фаолият кўрсатиб келмоқда.

Улар билан ўтказилган мулоқотлар натижасида 43,5 мингтасининг муаммолари сегментлаб олинди. Шундан 13 мингтаси бевосита бюджет билан муносабатларини оптималлаштиришни сўраган.

Маълумот учун: Ўтган йили пандемия оқибатларини юмшатиш мақсадида, Президентимизнинг тегишли фармонлари билан тадбиркорлик субъектларига 7,7 трлн. сўмдан ортиқ солиқ имтиёзлари ва енгилликлар берилган эди. Жумладан, 224 мингта субъектнинг 1,3 трлн. сўмлик солиқ қарзини мажбурий ундириш чоралари тўхтатиб турилди.

Бунга жавобан тадбиркорлик субъектлари солиқларининг 95 фоизини ихтиёрий равишда ўз муддатида тўлаган.