Insonning insoniyligi uning halolligi va pokligi bilan o‘lchanadi. Shuning uchun ota-bobolarimiz azaldan halol va pok yashashga harakat qilgan, halol bilan haromning farqiga borishgan va bu xususda yosh avlodga yetkazishgan.
Bugungi kunda ham halollik masalasiga hayotimizning yaxshilanishi va insoniyligimizning bosh mezoni sifatida qaralmoqda. Prezidentimiz Shavkat Mirziyoyev bu boradagi ishlar samaradorligini ta’minlashda, turli illatlardan xoli, farovon, odil jamiyatni qurishda eng muhim “richag” – har birimiz o‘zimizni “halollik vaksinasi” bilan emlashimiz kerakligini ta’kidladi.
“Halollik vaksinasi” – korrupsiyaga qarshi kurashish chora-tadbirlari majmuasi. Bu atama ilk marotaba O‘zbekiston Respublikasi Prezidentining 2020-yil 24-yanvardagi Oliy Majlisga Murojaatnomasida tilga olingan. Korrupsiyaga qarshi kurashda adolat bosh mezon hisoblanadi. Bunga erishishning yagona yo‘li “halollik vaksinasi”dir.
Davlat hokimiyati organlari faoliyatining shaffoflikni taʼminlash borasida kadrlar masalasi ham juda katta ahamiyatga ega. Zero, bu ham korrupsiyaning oldini olishga xizmat qiladi. Shu oʻrinda Sohibqiron Amir Temurning ushbu tuzuklarini eslash lozim: “...amir qildimki, vazirlar ushbu toʻrt sifatga ega kishilardan boʻlishlari lozim: birinchisi – asillik va toza nasllik, ikkinchisi – aql farosatlilik, uchinchisi – sipoh-u raiyat ahvolidan xabardorlik, ularga nisbatan xushmuomalalik, toʻtinchisi – sabr-chidamlilik va tinchliksevarlik. Kimki shu toʻrt sifatga ega boʻlsa, unday odamni vazirlik martabasiga loyiq deb bilsinlar. Uni vazir yoki maslahatchi etib tayinlasinlar. Mamlakat ishlarini, sipoh va raiyat ixtiyorini unga topshirsinlar. Bunday vazirga toʻrt imtiyoz: ishonch, eʼtibor, ixtiyor va qudrat berilsin”.
Nazarimizda, bu fikrlar hozirgi davr uchun ham dolzarb va hech qachon ahamiyatini yoʻqotmaydi.
So‘nggi yillarda yurtimizda ham korrupsiyaga qarshi kurashish va uni oldini olish masalasi davlat siyosati darajasiga ko‘tarildi, ushbu yo‘nalishda jiddiy qadamlar tashlandi. Xorazm viloyati davlat soliq boshqarmasida o‘tkazilgan navbatdagi “Ma’naviyat soati”da davlat soliq xizmati organlarida “Halollik vaksinasi” tamoyili asosida korrupsiyaga qarshi kurashish borasida amalga oshirilayotgan ishlar yuzasidan ma’ruza qilindi.
Boshqarma Shaxsiy xavsizlik bo‘limi xodimi Rasulbek Iskandarov Davlat soliq qo‘mitasining 2022-yil 15-apreldagi “Davlat soliq xizmati organlari, qo‘mita huzuridagi Kadastr agentligi, korxona va muassasalarda manfaatlar to‘qnashuvining oldini olish, aloqa kanallari orqali korrupsiyaviy xatti-harakatlar to‘g‘risida kelib tushgan xabarlarni qabul qilish va ko‘rib chiqish, odob-axloq qoidalari va korrupsiyaga qarshi kurashish sohasida o‘qitishni tashkil qilish bo‘yicha nizomlarni tasdiqlash haqida”gi 119-son buyrug‘i mazmun-mohiyati bilan xodimlarni batafsil tanishtirdi.
O‘quv seminarida taqdimotlar asosida tushunchalar berilib, olib borilgan muloqot davomida boshqarmaning Shaxsiy xavfsizlik bo'limi tomonidan tizim xodimlariga “Halollik vaksinasi” tamoyili asosida korrupsiyaga qarshi kurashish, manfaatlar to‘qnashuvi va odob-axloq qoidalari xususida atroflicha ma’lumot berib o‘tildi.
Xorazm viloyati DSB Matbuot xizmati