Ўзбекистон Республикаси Вазирлар Маҳкамаси ҳузуридаги Солиқ қўмитаси

Кўп қиррали ҳамкорликни мустаҳкамлаш

12/04/2021

Ўзбекистон Республикаси Давлат солиқ қўмитаси Раиси Шерзод Кудбиев Туркия Республикасининг мамлакатимиздаги янги тайинланган Фавқулодда ва Мухтор Элчиси Олган Бекарни қабул қилди.

Ш.Кудбиев учрашув аввалида Элчини масъулиятли лавозимга тайинлангани билан табриклади ва келгуси касбий фаолиятида муваффақиятлар тилади. Икки давлат раҳбарлари томонидан белгиланган вазифалар ижросини таъминлаш давлат идоралари раҳбарлари зиммасига юклатилганини таъкидлади. Бунда энг асосийси, Ўзбекистон ва Туркия ўртасидаги кўп қиррали ва ўзаро манфаатли ҳамкорликни янада мустаҳкамлаш эканлиги қайд этилди.

Учрашув давомида Давлат солиқ қўмитаси раиси Ўзбекистон солиқ маъмуриятчилигини такомиллаштириш учун Туркия Республикаси каби миллий руҳга яқин мамлакатлар, шунингдек, иқтисодий алоқалар туташ бўлган Жанубий Корея ва Россия Федерацияси билан тажриба алмашиш муҳимлигини таъкидлади.

Шунингдек, Элчи Туркия Республикаси Ўзбекистон Давлат солиқ қўмитасига ходимларнинг малакасини ошириш, тажриба алмашиш борасида ҳар томонлама кўмаклашишга ва ҳамкорликнинг янги қирраларини қайта кўриб чиқишга тайёрлигини билдирди.

Ўзбекистон-Туркия кун тартибидаги долзарб мавзулар, солиқ соҳасидаги яқин алоқаларни ривожлантириш, хусусан, икки томонлама солиққа тортишнинг олдини олиш учун солиқ хизматлари ўртасида ўзаро маълумот алмашинувини йўлга қўйиш каби масалалар муҳокама қилинди. Шунингдек, учрашувда томонларнинг ўзаро манфаатли бўлган бошқа масалалари ҳам кўриб чиқилди.

ДСҚ Матбуот хизмати